स्रोत नखुलेको रकमसहित अगर्वाबाट तीन जना पक्राउ

सर्लाही, २२ चैत । श्रोत नखुलेको रकमसहित कविलासी नगरपालिकाबाट तीन जनालाई सशस्त्र प्रहरीले नियन्त्रणमा लिएको छ । कविलासी नगरपालिका ८ अगर्वाबाट श्रोत नखुलेको ५ लाख भारतीय र ५ लाख नेपाली रुपैयाँसहित तीन जनालाई सशस्त्र प्रहरीले नियन्त्रणमा लिएको हो । सर्लाही धनकौल गाँउपालिका ६ घर भई हाल हरिवन नगरपालिका ११ बस्ने ४५ वर्षीय गान्धि साह सोनार, रुपन्देही जिल्लाको साविक फरेना गाविस ६ बस्ने ३५ वर्षीय राजेश बनिया र भारत घर भई हाल पर्सा जिल्लाको विरगञ्ज महानगरपालिका १९ बस्ने १९ वर्षीय अनिल साहलाई नम्बर १० गण कविलासीबाट खटिएको टोलीले बुधवार बिहान नियन्त्रणमा लिएको छ । विशेष सूचनाको आधारमा खटिएको सशस्त्र प्रहरीले मलंगवाबाट नवलपुरतर्फ जाँदै गरेको तीन जना सवार प्रदेश नं २–०३–०१५ प ५९६९ नम्बरको मोटरसाइकल रोकी जाँच गर्दा उनीहरुको साथमा उक्त रुपैयाँ फेला परेको र सो रुपैयाँको श्रोत खुलाउन नसकेपछि नियन्त्रणमा लिइएको सशस्त्रले जनाएको छ । उनीहरुको साथबाट भारतीय रुपैयाँ ५ सय दरको ९ सय ९६ वटा (४ लाख ९८ हजार), २ हजार दरको एक वटा र नेपाली रुपैयाँ ५० दरको ३२ वटा (१ हजार ६ सय), १ सय दरको ४ सय ८४ वटा (४८ हजार ४ सय), ५ सय दरको ३ सय वटा (१ लाख ५० हजार), १ हजार दरको ३ सय वटा (३ लाख) नोट बरामद भएको हो । नियन्त्रणमा लिएका तीनै जनालाई बरामद रुपैयाँसहित आवश्यक कारबाहीको लागि राजश्व अनुसन्धान कार्यालय पथलैया बारामा बुझाएको सशस्त्रले जनाएको छ ।